//single page style gallary page

Questions? reply in 15 minutes!

Questions? reply in 15 minutes!

పాక్ కి ట్రంప్ వార్నింగ్ !

Category : world

ఉగ్రవాదులు కిడ్నాప్ చేసిన కెనడా-అమెరికన్ కుటుంబాన్ని పాక్ సైన్యం రక్షించినప్పుడు వారితోపాటు ఓ తీవ్రవాదిని కూడా పట్టుకున్నారు. ఈ తీవ్రవాది హక్కానీ సంస్థకు చెందిన వ్యక్తిగా అమెరికా అధికారులు గుర్తించారు. అతడిని తమకు అప్పగించాలని పాకిస్థాన్‌ను అమెరికా డిమాండ్ చేసింది. కానీ ఈ ప్రతిపాదనలను పాక్ తోసిపుచ్చింది. దీంతో పాక్ వైఖరిపై అమెరికా మరోసారి అనుమానం వ్యక్తంచేసింది. తమ భూభాగంలోని ఉగ్రవాద స్థావరాలు, సంస్థలపై ఎలాంటి చర్యలు తీసుకోవడం లేదని అగ్రరాజ్యం భావిస్తోంది. ఉగ్రవాదంపై పోరాటానికి పాక్‌కు చేస్తోన్న ఆర్థిక సాయాన్ని కూడా నిలిపివేయాలనే నిర్ణయానికి వచ్చింది.

ఉగ్రవాదంపై పాక్ తీసుకుంటున్న చర్యలు శూన్యమని భావిస్తూ ట్రంప్‌ సర్కార్ ఈ నిర్ణయం తీసుకున్నట్లు న్యూయార్క్‌ టైమ్స్‌ పత్రిక ఓ కథనాన్ని ప్రచురించింది. ప్రస్తుతం అందించాల్సిన 255 మిలియన్ డాలర్ల సాయాన్ని నిలిపేయాలని అమెరికా అధికారులు పేర్కొన్నట్లు న్యూయార్క్ టైమ్స్ తన కథనంలో తెలిపింది. ఉగ్రవాదంపై పోరాటంలో భాగంగా సైనిక సామర్థ్యాన్ని పెంచుకోవడానికి 2002 నుంచి పాకిస్థాన్‌కు అమెరికా ఆర్థిక సాయం అందిస్తోంది. ఇప్పటి వరకు 33 బిలియన్‌ డాలర్లకు పైగా సాయం అందించింది. అయితే అమెరికా అధ్యక్షుడిగా ట్రంప్ బాధ్యతలు చేపట్టిన తర్వాత పాక్ విషయంలో ఆయన ఓ స్పష్టమైన విధానంతో ముందుకు సాగుతున్నారు.

ఉగ్రవాదంపై పాకిస్థాన్ తన వైఖరి మార్చుకోకుంటే కఠిన చర్యలు తప్పవని గత ఆగస్టులోనే ట్రంప్ హెచ్చరించారు. అంతేకాదు పాకిస్థాన్‌ ఉగ్రవాదులకు స్వర్గధామంగా మారిందని ఆరోపణలు చేశారు. తమ భూభాగంలోని తీవ్రవాద సంస్థల పట్ల పాక్ ఉదాసీనంగా వ్యవహరిస్తోందని అమెరికా అసంతృప్తి వ్యక్తం చేస్తూనే ఉంది. ఆర్థిక సాయం గురించి గత ఆగస్టులో ట్రంప్‌ సర్కారు హెచ్చరికలు చేసింది. తాజాగా ఈ విషయంపై మరోసారి సమావేశం ఏర్పాటుచేసింది. పాక్‌కు ఎలాంటి ఆర్థికసాయం చేయకూడదని ఈ సమావేశంలో నిర్ణయం తీసుకున్నట్లు న్యూయార్క్ టైమ్స్ తెలిపింది.

అయితే పాక్‌ కోసం కేటాయించిన నిధులు ఏం చేయాలి అన్నదానిపై త్వరలోనే నిర్ణయం తీసుకోనున్నారు. మరోవైపు అమెరికా ఆరోపణలను పాక్‌ తోసిపుచ్చింది. ఉగ్రవాదాన్ని నిర్మూలించేందుకు తాము పోరాడుతున్నట్లు తెలిపింది. అమెరికాకు చెందిన కెయిట్లిన్ కోల్‌మన్, ఆమె భర్త కెనడా సంతతి జోష్వా బోయల్, వారి కుమారుడిని అయిదేళ్ల కిందట వాయువ్య పాకిస్థాన్ ప్రాంతంలో హక్కానీ ఉగ్రవాదులు కిడ్నాప్ చేశారు. గత అక్టోబరులో వారి చెర నుంచి పాక్ సైన్యం ఈ కుటుంబాన్ని రక్షించింది. కానీ ఈ తీవ్రవాదులు పాకిస్థాన్‌ భూభాగం నుంచే వచ్చినట్లు అమెరికా నిఘా డ్రోన్లు గుర్తించాయి.