//single page style gallary page

Questions? reply in 15 minutes!

Questions? reply in 15 minutes!

ముంబై వరస పేలుళ్లకు పాల్పడిన నిందితులకు ఉరిశిక్ష ఖరారు

Category : national

1993 ముంబై పేలుళ్ల కేసుపై టాడా కోర్టు కీలక తీర్పు వెలువరించింది. వరస పేలుళ్లకు పాల్పడి వందలాది మంది ప్రాణాలను పొట్టన పెట్టుకున్న ప్రధాన నిందితులు తాహిర్, ఫిరోజ్ ఖాన్‌కు మరణశిక్ష ఖరారు చేసింది. కీలక సూత్రధారి, అండర్ వరల్డ్ డాన్ అబూ సలేంకు జీవితఖైదు విధించింది. ఇతడితో పాటు మరో ప్రధాన నిందితుడు కరీముల్లా ఖాన్‌కు జీవిత ఖైదు విధించింది. వీరిద్దరికీ తలో రూ. 2 లక్షల జరిమానా కూడా విధించింది. మరో నిందితుడు రియాజ్ సిద్ధిఖీకి పదేళ్ల జైలుశిక్ష విధించింది. ఆరో నిందితుడు ముస్తఫా దోసా గుండెపోటుతో మరణించిన విషయం తెలిసిందే. ఈ నిందుతులందరినీ టాడా కోర్టు జూన్ 16న దోషులుగా ప్రకటించింది. అదే రోజున ఏడో వ్యక్తి అబ్దుల్ ఖయ్యూంను విడుదల చేస్తూ కోర్టు ఆదేశించింది.

పోర్చుగల్‌తో ఉన్న ఒప్పందం కారణంగా ప్రధాన సూత్రధారి అబూసలేంకు మరణశిక్ష విధించనట్లు సమాచారం. 24 ఏళ్ల తర్వాత ఈ కేసులో కీలక తీర్పు వెలువడటంతో సర్వత్రా ఆసక్తి నెలకొంది.1993 మార్చి 12న ముంబై నగరంలో 12 ప్రదేశాల్లో వరస బాంబు పేలుళ్లకు తెగబడ్డారు. 257 మందిని పొట్టన పెట్టుకున్న ఈ ఘటన అప్పట్లో పెను సంచలనం సృష్టించింది. ఘటనలో మరో 713 మంది తీవ్రంగా గాయపడ్డారు. అండర్ వరల్డ్ డాన్ దావూద్ ఇబ్రహీంతో పాటు టైగర్ మెమన్, యాకుబ్ మెమన్‌ ఈ పేలుళ్ల కుట్రకు ప్రధాన సూత్రదారులుగా గతంలోనే గుర్తించారు. నిందితులపై బాంబు పేలుళ్లకు కుట్రపన్నడం, ప్రభుత్వంపై యుద్ధం ప్రకటించడం, హత్యా నేరాల కింద కేసులు నమోదయ్యాయి. దావూద్ ఇబ్రహీం, టైగర్ మెమన్ దేశం విడిచి పారిపోగా పోలీసులు యాకుబ్‌ను అరెస్టు చేశారు. 2015 జులై 30న నాగ్‌పూర్ జైలులో యాకుబ్‌కు ఉరిశిక్ష అమలు చేశారు.‌