//single page style gallary page

Questions? reply in 15 minutes!

Questions? reply in 15 minutes!

ఆసక్తికర పోరులో ఆర్సీబీ విజయం....

Category : sports

ఐపీఎల్ 2018 సీజన్‌లో ప్లేఆఫ్ ఆశలు నిలవాలంటే తప్పక గెలవాల్సిన మ్యాచ్‌లో రాయల్ ఛాలెంజర్స్ బెంగళూరు జట్టు ఎట్టకేలకి సన్‌రైజర్స్ హైదరాబాద్‌పై 14 పరుగుల తేడాతో గెలిచి ఊపిరి పీల్చుకుంది. గురువారం రాత్రి చిన్నస్వామి స్డేడియంలో జరిగిన మ్యాచ్‌లో తొలుత హిట్టర్లు ఏబీ డివిలియర్స్ (69: 39 బంతుల్లో 12x4, 1x6), మొయిన్ అలీ (65: 34 బంతుల్లో 2x4, 6x6), గ్రాండ్ హోమ్ (40: 17 బంతుల్లో 1x4, 4x6) చేలరేగడంతో నిర్ణీత 20 ఓవర్లలో6 వికెట్ల నష్టానికి 218 పరుగుల భారీ స్కోరు సాధించింది బెంగళూరు జట్టు.

అనంతరం ఛేదనకు దిగిన హైదరాబాద్ జట్టును శ్రమకోర్చి 204/3కి కట్టడి చేసింది. ఛేదనలో ఓపెనర్లు ధావన్ (18), అలెక్స్ హేల్స్ (37) విఫలమైనా.. కెప్టెన్ కేన్ విలియమ్సన్ (81: 42 బంతుల్లో 7x4, 5x6), మనీశ్ పాండే (62 నాటౌట్: 38 బంతుల్లో 7x4, 2x6) అసాధారణ ఇన్నింగ్స్ ఆడటంతో.. ఒకానొక దశలో బెంగళూరు చేతి నుంచి మ్యాచ్ చేజారేలా కనిపించింది. కానీ.. ఆఖరి 6 బంతుల్లో 20 పరుగులు చేయాల్సిన దశలో తొలి బంతికే విలియమ్సన్ ఔటవడంతో.. మ్యాచ్‌ మళ్లీ బెంగళూరు వైపు మొగ్గింది.

చివరి బంతి వరకూ క్రీజులో నిలిచిన మనీశ్ పాండే ఒత్తిడికి గురై పేలవ షాట్లు ఆడటంతో సీజన్‌లో హైదరాబాద్ జట్టుకి నాలుగో ఓటమి తప్పలేదు. మరోవైపు ఆడిన 13 మ్యాచ్‌ల్లో ఆరో విజయాన్ని అందుకున్న బెంగళూరు జట్టు పాయింట్ల పట్టికలో ఐదో స్థానానికి ఎగబాకి.. ప్లేఆఫ్ రేసుని మరింత ఆసక్తికరంగా మార్చేసింది. హైదరాబాద్ జట్టు ఇప్పటికే ప్లేఆఫ్ చేరిన విషయం తెలిసిందే.

సీజన్‌లో వరుసగా మూడో మ్యాచ్‌లోనూ సన్‌రైజర్స్ హైదరాబాద్ బౌలర్లు లయ తప్పారు. ఓపెనర్లు పార్థీవ్ పటేల్(1)ని తొలి ఓవర్‌లోనే ఔట్ చేసి హైదరాబాద్‌కి సందీప్ శర్మ శుభారంభమివ్వగా.. తర్వాత కొద్దిసేపటికే కెప్టెన్ విరాట్ కోహ్లీ (12)కి రషీద్ ఖాన్ బోల్తా కొట్టించడంతో బెంగళూరు 38/2తో ఇబ్బందుల్లో పడింది. ఈ దశలో క్రీజులోకి వచ్చిన ఏబీ డివిలియర్స్, మొయిన్‌ అలీతో కలిసి మెరుపు ఇన్నింగ్స్ ఆడాడు.

ఈ ఇద్దరూ మూడో వికెట్‌కి అభేద్యంగా 107 పరుగుల భాగస్వామ్యం నెలకొల్పడంతో బెంగళూరు జట్టు భారీ స్కోరు బాటలు వేసుకుంది. ప్రమాదకరంగా మారిన ఈ ఇద్దర్నీ రెండు బంతుల వ్యవధిలో రషీద్ ఖాన్ ఔట్ చేసినా.. ఆఖర్లో గ్రాండ్ హోమ్, సర్ఫరాజ్ ఖాన్ (22 నాటౌట్: 8 బంతుల్లో 3x4, 1x6) బ్యాట్ ఝళిపించేశారు. పేలవ బౌలింగ్‌కి తోడు ఫీల్డింగ్ తప్పిదాలు కూడా సన్‌రైజర్స్ హైదరాబాద్‌ని దారుణంగా దెబ్బతీశాయి.

మొయిన్ అలీ క్యాచ్‌ని శిఖర్ ధావన్, గ్రాండ్ హోమ్ క్యాచ్‌ని రషీద్ ఖాన్ జారవిడచడం‌తో బెంగళూరు హిట్టర్లకి లైసెన్స్ ఇచ్చినట్లయింది. భువనేశ్వర్ కుమార్ స్థానంలో జట్టులోకి వచ్చిన ఫాస్ట్ బౌలర్ బసిల్ థంపీ 4 ఓవర్లు వేసి ఒక వికెట్ కూడా పడగొట్టలేకపోగా.. ఏకంగా 70 పరుగులిచ్చాడు. పదేళ్ల ఐపీఎల్‌ చరిత్రలో ఈ తరహాలో ఏ బౌలరూ ఎక్కువ పరుగులివ్వలేదు.