ఉపవాసం ఉండకపోతే జైలుకు పంపే చట్టాన్ని తీసుకొచ్చిన పాక్

ఎంతో పవిత్రమైన రంజాన్ మాసంలో ముస్లింలు కఠోరమైన ఉపవాస దీక్షలు చేస్తుంటారు. అయితే ఈ మాసంలో ఉపవాస దీక్షలు పాటించకుండా ఆహారం స్వీకరిస్తే జైలుకి పంపే చట్టాన్ని పాకిస్తాన్ తీసుకొచ్చింది. ఈ వారం ప్రారంభంలో 1980 ఆర్డినెన్స్ కు పాక్ సెనేట్ సవరణ చేసింది. రంజాన్ మాసంలో బహిరంగంగా తిన్నా, ధూమపానం చేసినా రూ. 500 జరిమానాతో పాటు మూడు నెలల జైలు శిక్ష విధించేలా చట్టంలో మార్పులు చేశారు. ఈ నిర్ణయంపై దివంగత పాక్ ప్రధాని బెనజీర్ భుట్టో కుమార్తె బఖ్తవార్ భుట్టో జర్దారీ తీవ్ర ఆగ్రహం వ్యక్తం చేశారు. ప్రజలను పొట్టనబెట్టుకుంటున్న ఉగ్రవాదులను రోడ్లపై స్వేచ్ఛగా తిరగనిస్తూ... సామాన్యులను మాత్రం జైలుకు పంపే కార్యక్రమం చేస్తోందని మండిపడ్డారు. ఈ చట్టంతో ప్రజలు హీట్ స్ట్రోక్, డీహైడ్రేజషన్ తో చనిపోతారని ఆమె చెప్పారు. అసలు ఇది ఇస్లాంకు పూర్తిగా వ్యతిరేకమని ఆమె ట్వీట్ చేశారు.