//single page style gallary page

Questions? reply in 15 minutes!

Questions? reply in 15 minutes!

ప్రభుత్వ పరిహారం కోసం పులులకు ఆహారం అవుతున్న వృద్ధులు.

Category : national

ఉత్తరప్రదేశ్ లోని పిలిబిత్ టైగర్ రిజర్వ్ ఫారెస్ట్‌లో వరసగా ముసలివాళ్లు పులుల బారిన పడుతుండటంపై చేపట్టిన విచారణలో సంచలన విషయాలు వెలుగులోకి వస్తున్నాయి. ఈ మధ్య కాలంలోనే వరసగా ఏడు మంది వృద్ధులు పులులకు బలి కావడం గురించి విచారణ జరిపిన అధికారులు విస్మయకరమైన విషయాలను ప్రకటించారు. ఈ ప్రాంతంలోని గ్రామాల్లోని మనుషులు కావాలనే పులుల బారిన పడుతున్నట్టుగా తెలుస్తోంది. ప్రభుత్వ పరిహారం కోసమే వారు ప్రాణాలను కోల్పోతున్నారని అధికారులు వివరించారు.

ఇలా పులులకు ఆహారం అవుతున్న వారిలో వృద్ధులే ఉంటున్నారు. ఇక జీవితం అయిపోయిందని పులుల బారిన పడితే ప్రభుత్వం పరిహారం ఇస్తుందని ముసలి వాళ్లు ఇలాంటి పనులు చేస్తున్నారని అధికారులు తేల్చారు. ఈ విషయంలో వారి వారి కుటుంబీకుల ప్రోద్బలం, ఒత్తిళ్లు ఉండవచ్చని కూడా అధికారులు అభిప్రాయపడుతున్నారు. ఈ ఏడాది ఫిబ్రవరి నుంచి ఇప్పటి వరకూ అటవీ ప్రాంతానికి అనుకుని ఉన్న పొలాల్లో ఏడుగురు వృద్ధుల శవాలు అగుపించాయి. వారు పులుల బారిన పడి మరణించారు. వారి శవాలను పులులు పాక్షికంగా పీకుతిన్నాయి. ఇలాంటి శవాలన్నీ పొలాల్లోనే దొరుకుతుండటంతో అటవీ శాఖ అధికారులకు అనుమానాలు వచ్చాయి.

అభయారణ్యంగా ప్రకటించిన ప్రాంతంలో వన్యప్రాణుల దాడిలో ఎవరైనా మరణిస్తే వారికి పరిహారం రాదు. అదే అడవి జంతువులు పొల్లాల్లోకి వచ్చి ఎవరిపైనైనా దాడి చేసి చంపితే పరిహారం వస్తుంది. అందుకే ముందుగా ముసలివాళ్లు అభయారణ్యంలోకి ప్రవేశిస్తున్నారని. వారు పులులకు చిక్కి మరణించాకా, ఇంట్లో వాళ్లు వారి శవాలను తెచ్చి పొలాల్లో వేస్తున్నారని అధికారులు తేల్చారు. ప్రభుత్వం నుంచి వచ్చే పరిహారం కోసమే ఈ పనులు చేస్తున్నారని అధికారులు తమ నివేదికలో పేర్కొన్నారు. ఈ విషయంలో గ్రామీణులను హెచ్చరించాలని, ఇలాంటి పనులకు పాల్పడనీయకుండా చూడాలని ప్రభుత్వానికి సూచించారు.