//single page style gallary page

Questions? reply in 15 minutes!

Questions? reply in 15 minutes!

కాంగ్రెస్ పై మోడీ ఫైర్....

Category : politics

ఉమ్మడి ఆంధ్రప్రదేశ్‌ను కాంగ్రెస్‌ విభజించిన తీరు వల్లే ఇన్నేళ్లయినా సమస్యలు అలాగే ఉన్నాయని ప్రధాని మోదీ విమర్శించారు. వాజ్‌పేయి హయాంలో ఎన్డీఏ ప్రభుత్వం 3 రాష్ట్రాలను విభజిస్తే ఎలాంటి వివాదాలు రాలేదని, కాంగ్రెస్‌ పార్టీ ఒక్క రాష్ట్రాన్ని విభజిస్తే నాలుగేళ్లుగా సమస్యలు కొనసాగుతూనే ఉన్నాయని ఆయన అన్నారు. బుధవారం (ఫిబ్రవరి 7) ఆయన లోక్‌సభలో రాష్ట్రపతి ప్రసంగానికి ధన్యవాదాలు తెలిపే తీర్మానంపై మాట్లాడారు. 90 నిమిషాల పాటు సుదీర్ఘంగా మాట్లాడిన ప్రధాని పలు అంశాలను ప్రస్తావించారు.

తెలంగాణ ప్రజల మనోభావాలకు అనుగుణంగానే తాము ప్రత్యేక రాష్ట్ర ఏర్పాటుకు మద్దతు పలికామని మోదీ తెలిపారు. ‘వాజ్‌పేయి ప్రభుత్వం దీర్ఘదృష్టి కారణంగా 3 రాష్ట్రాలు విభజించినా.. ఎలాంటి సమస్యలు రాలేదు. ఎవరి వాటాలు వారికి ఇచ్చారు. కానీ, ఆంధ్రప్రదేశ్‌ విషయంలో అలా జరగలేదు. రాజకీయ లబ్ధి కోసం పార్లమెంటు తలుపులు మూసివేసి విభజన బిల్లు ఆమోదింపజేసుకున్నారు’ అని మోదీ అన్నారు.

నాడు కాంగ్రెస్‌ పార్టీ ఇష్టారీతిగా వ్యవహరించిందని, వారు చేసిన తప్పుల వల్లే ఇవాళ ప్రతిపక్షంలో కూర్చున్నారని మోదీ మండిపడ్డారు. ప్రజాస్వామ్యం గురించి మాట్లాడే అర్హత కాంగ్రెస్‌ పార్టీకి లేదని అన్నారు.

తెలుగువారి ఆత్మగౌరవం కోసమే ఎన్టీఆర్‌ పార్టీ స్థాపించారు..ప్రధాని మోదీ తన ప్రసంగం మధ్యలో ఎన్టీఆర్‌ గురించి గుర్తు చేశారు. తెలుగు ప్రజల ఆత్మగౌరవం కాపాడేందుకు తెలుగుదేశం పార్టీ ఆవిర్భవించిందని, దీనికోసమే తెలుగు ప్రజల అభిమాన నటుడు ఎన్టీఆర్‌ సినిమాలను వదిలి రాజకీయ ప్రవేశం చేశారని ఆయన చెప్పారు.

‘కాంగ్రెస్‌ పార్టీ, నెహ్రూ ప్రజాస్వామ్యబద్ధంగా వ్యవహరించలేదు. తమిళనాడు, పంజాబ్‌, కేరళ రాష్ట్రాల్లో ప్రజాస్వామ్యాన్ని అణచివేసింది. హైదరాబాద్‌లో ఏపీ దళిత ముఖ్యమంత్రిని రాజీవ్‌గాంధీ అవమానించారు. నీలం సంజీవరెడ్డి, అంజయ్యను కాంగ్రెస్‌ పార్టీ తీవ్రంగా అవమానించింది. ఏపీలో కాంగ్రెస్‌ చేసిన రాజకీయ అరాచకాలు అనేకం. అలాంటివారా ఆ రాష్ట్రం గురించి మాట్లాడేది. కర్ణాటక ఎన్నికలు లేకుంటే ఆంధ్రప్రదేశ్‌ విభజన గురించి మల్లికార్జున ఖర్గే మాట్లాడేవారా?’ అని మోదీ ప్రశ్నించారు.

పార్టీలు శాశ్వతం కాదని, దేశమే శాశ్వతమన్న విషయాన్ని కాంగ్రెస్ గుర్తుంచుకోవాలని మోదీ సూచించారు. కాంగ్రెస్‌ పార్టీ హయంలో రోజుకు 11 కి.మీ. మేర రోడ్డు వేస్తే.. తమ హయాంలో రోజుకు 22 కి.మీ. మేర రహదారులు వేసినట్లు తెలిపారు.

‘అభివృద్ధి విషయంలో ప్రతిపక్ష నియోజకవర్గమా? మన నియోజకవర్గమా? అనే భేదాన్ని మేం చూపించడం లేదు. ఖర్గే ఎంపీగా ఉన్న బీదర్‌లో వాజ్‌పేయి ప్రభుత్వం 1020 కి.మీ. మేర రైల్వేలైన్‌ వేసింది. ఖర్గే రైల్వే మంత్రిగా ఉండి ఏం చేశారో చెప్పాలి’ అరి మోదీ అన్నారు.

యూపీఏ కంటే తమ ప్రభుత్వం వచ్చాకే అత్యధిక గ్రామాల్లో ఫైబర్‌నెట్‌ వ్యవస్థ ఏర్పాటు చేసినట్లు మోదీ తెలిపారు. సమతుల అభివృద్ధని ప్రతిపక్షం ఇన్నాళ్లూ సాధించలేకపోయిందని.. తాము చేసి చూపించామని చెప్పారు. అవినీతి, దళారి వ్యవస్థకు తాము కళ్లెం వేశామని ప్రతిపక్షం బాధపడుతోందని ఎద్దేవా చేశారు.

‘మా హయంలో అతి పొడవైన సొరంగం, అత్యంత వేగవంతమైన రైళ్లు, గ్యాస్‌ పైప్‌లైన్లు వచ్చాయి. కేరళ, బెంగాల్‌, ఒడిశా, కర్ణాటకలో కోటి మందికి ఉపాధి కల్పించాం. ఇచ్చిన హామీల మేరకు ఈశాన్య రాష్ట్ర్లాల్లో అభివృద్ధి పనులు ప్రారంభించాం’ అని మోదీ అన్నారు.