//single page style gallary page

Questions? reply in 15 minutes!

Questions? reply in 15 minutes!

హనుమాన్ చాలీసా పఠించిన ముస్లిం మహిళలు

Category : national editorial

ముస్లిం మహిళలు హనుమాన్ చాలీసా పఠించారు. ఎందుకో తెలుసా? ట్రిపుల్ తలాఖ్ రద్దు చేయాలని కోరుతూ వారు హనుమాన్ చాలీసా పఠించారు. ఖురాన్ చదివే ఇస్లాం వనితలు తమ జీవితాల్లో మార్పు తీసుకురావాలని ఆ ఆంజనేయుణ్ని ప్రార్థించారు. ప్రధాని మోదీ ప్రాతినిధ్యం వహిస్తోన్న వారణాసి నియోజకవర్గంలోని దర్గానగర్‌ లో ఉన్న హనుమాన్ ఆలయంలో ఈ ఘటన చోటు చేసుకుంది. ట్రిపుల్ తలాఖ్ నుంచి తమను కాపాడాలంటూ వారు హనుమంతుడి దగ్గర తమ గోడు వెళ్లబోసుకున్నారు. తలాఖ్‌ కు సంబంధించిన పిటిషన్‌ పై సుప్రీం కోర్టు వాదనలను విననున్న నేపథ్యంలో వారిలా తమ ఆవేదనను తెలియజేశారు.

హనుమంతుడి ఆశీస్సులు పొందేందుకే తాము ఉర్దూలో రాసుకొని వందసార్లు చాలీసా పఠించామని ముస్లిం మహిళలు తెలిపారు. ట్రిపుల్ తలాఖ్, బహుభార్యత్వం తదితర దురాచారాల నుంచి ముస్లిం మహిళలకు ఉపశమనం లభించాలన్నారు. అత్యంత ప్రాధాన్యం ఉన్న కేసు కావడంతో సుప్రీం కోర్టు సెలవుల్లోనూ ట్రిపుల్ తలాఖ్‌ పై విచారణ ప్రారంభించింది. విభిన్న మతాలకు చెందిన ఐదుగురు సభ్యుల ధర్మాసం ఈ విచారణ చేపడుతోంది. మౌలిక హక్కులపై ముస్లిం పర్సనల్ లా బోర్డ్ జోక్యం చేసుకుంటున్న విషయాన్ని కూడా కూడా అత్యున్నత న్యాయస్థానం పరిశీలిస్తోంది.

తలాఖ్ కేసు విచారణ సందర్భంగా సుప్రీం కోర్టు వ్యాఖ్యానిస్తూ.. కేవలం నోటి మాట ద్వారా విడాకులు తీసుకునే విషయంలో రాజ్యాంగ బద్ధతను పరిశీలిస్తున్నామని, బహుభార్యత్వంపై కాదని స్పష్టం చేసింది. ముస్లిం సమాజంలో ట్రిపుల్ తలాఖ్ అనేది ప్రాథమిక హక్కుల్లో భాగమో కాదో.. గుర్తిస్తామని న్యాయస్థానం తెలిపింది. ట్రిపుల్ తలాఖ్ వివాదంపై సుప్రీం కోర్టు గురువారం నుంచి ఆరు రోజులపాటు ఇరు వర్గాల వాదనలు విననుంది.