Questions? reply in 15 minutes!

Questions? reply in 15 minutes!

ప్రపంచంలోనే అత్యంత నివాసయోగ్య నగరంగా మెల్‌బోర్న్

Category : world

ప్రపంచంలోనే అత్యంత నివాసయోగ్యమైన నగరంగా ఆస్ట్రేలియా రాజధాని మెల్‌బోర్న్ నిలిచింది. ఆ తర్వాత వియన్నా, కెనడాలోని వాంకోవర్ రెండు, మూడుస్థానాలను కైవసం చేసుకున్నట్టు సర్వేలో వెల్లడయింది. ఎకానమిస్ట్ ఇంటెలిజెన్స్ యూనిట్ (ఈఐయూ) 140 దేశాల్లో సర్వే నిర్వహించి ప్రపంచ నివాసయోగ్య నగరాల నివేదికను తయారుచేసింది.

తొలిపది నగరాల్లో భారత్‌కు చోటుదక్కలేదు. టాప్ పదిలో నిలిచిన మిగతా నగరాల్లో నాలుగోస్థానంలో టొరంటో నిలువగా,  ఆ తర్వాత వరుసగా కాల్‌గరీ, ఆడిలైడ్, పెర్త్, ఆక్లాండ్, హెల్‌సింకి, పదోస్థానంలో హాంబర్గ్ చోటుదక్కించుకున్నాయి. చాలా నగరాల్లో అస్థిరత నెలకొన్నదని, ఉగ్రవాదం మరింత విస్తరిస్తున్నదని సర్వేలో తేలింది.

ముఖ్యంగా ఫ్రాన్స్, బ్రిటన్ దేశాల్లో తరుచూ దాడులు జరుగుతున్నాయని, ఉగ్రవాద హెచ్చరికలు పెరుగుతున్న నేపథ్యంలో అక్కడి నగరాలు ఈ జాబితాలో స్థానం దక్కించుకోలేకపోయాయని సర్వే నివేదికలో వెల్లడయింది. ఇరాక్, లిబియా, సిరియా, టర్కీ, నైజీరియా తదితర దేశాల్లో అంతర్యుద్ధాలు, సాయుధ పోరాటాలు చెలరేగుతున్నాయని ఈ నివేదికలో గుర్తుచేసింది.

అమెరికాలో నల్లజాతీయుల ఉద్యమం, అధ్యక్షుడు ట్రంప్ తీసుకుంటున్న విధాన నిర్ణయాల వల్ల ఆందోళనలు జరుగుతున్నాయని నివేదిక పేర్కొన్నది. సర్వే ప్రకారం నివాసయోగ్యమైన నగరాల్లో చిట్టచివరన దమస్కస్ 140వ స్థానంలో నిలువగా, ట్రిపోలి, ఢాకా, ఆల్జీర్స్, కరాచీ, హరారే, డౌఆలా, కీవ్ చివరిస్థానాల్లో నిలిచాయి. స్థిరత్వం, ఆరోగ్యసంరక్షణ, సంస్కృతి, పర్యావరణం, విద్య, మౌలికసదుపాయాల్లో పలు అంశాలను పరిశీలించి ర్యాంకులను నిర్ణయించారు.

Related News