సల్వార్ లో భారత వీరనారి కవిత రెజ్లింగ్

సల్వార్ కమీజ్ తో వరల్డ్ రెజ్లింగ్ ఎంటర్ టైన్ మెంట్ (డబ్ల్యూడబ్ల్యూఈ)లో పోటీపడిన భారత వీరనారి కవితా దేవి. ఇప్పుడు ఆమె పోరాటానికి సంబంధించిన వీడియో సంచలనంగా మారింది. సంప్రదాయ దుస్తుల్లో ఆమె హీరోచిత పోరాటాన్ని నెటిజన్లు తెగ ఎంజాయ్ చేస్తున్నారు.వరల్డ్ రెజ్లింగ్ ఎంటర్ టైన్ మెంట్ లో తొలిసారి అడుగుపెట్టిన భారతీయుడు గ్రేట్ కాళీ బాటలోనే హరియాణాకు చెందిన రెజ్లర్ కవితా దేవీ నడుస్తోంది. వరల్డ్ రెజ్లింగ్ ఎంటర్ టైన్ మెంట్ లో అడుగుపెట్టిన భారత తొలి మహిళగా చరిత్ర సృష్టించింది.

స్పోర్ట్స్ కోటాలో సహస్త్ర సీమాబల్(ఎస్ ఎస్ బి)లో కానిస్టేబుల్ గా చేరినా.. టోర్నమెంటుల్లో పాల్గొనేందుకు అనుమతి నిరాకరణ - అంతర్జాతీయ స్థాయిలో రష్యాలో జరిగిన పోటీలకు అనుమతి ఇవ్వకపోవడంతో ఆమె ఉద్యోగానికి 2010లో రాజీనామా చేసింది.కవితా దేవి వెయిట్ లిఫ్టింగ్ లో - మిక్స్డ్ మార్షల్ ఆర్ట్స్ లో జాతీయ చాంపియన్.ప్రపంచంలోనే మొదటిసారి మహిళలకోసం ఏర్పాటుచేసిన డబ్ల్యూడబ్ల్యూఈ పోటీల్లో మన దేశానికి ప్రాతినిథ్యం వహించింది.

ఈ సందర్భంగా మే యంగ్ క్లాసిక్ టోర్నీలో న్యూజిలాండ్ రెజ్లర్ కోటా కైతో కవిత తలపడింది. ఇక్కడ నెటిజన్లను అమితంగా ఆకర్షించింది ఆమె వస్త్రధారణ. నారింజ రంగు సల్వార్ కమీజ్ ధరించిన కవిత నడుం చుట్టూ దుపట్టా కట్టుకొని కుస్తీ పట్టింది. ప్రత్యర్థిని తన కండబలంతో పైకి ఎగరేసి కింద పడేసింది. పోటీకి కొత్తగా వచ్చిన ఆమె కొన్ని సాంకేతిక కారణాలతో ఓడినా తన పోరాట పటిమతో అందరినీ మెప్పించింది. ఆగస్టు 31న యూట్యూబ్ లో పెట్టిన ఈ వీడియో ఇప్పుడు వైరల్ గా మారింది. ఇప్పటివరకూ 30 లక్షల మంది వీక్షించడంతో సంచలనం సృష్టిస్తోంది.