అతి చిన్న వయస్సులో 39 ఏళ్లకే గత వారం ఫ్రాన్స్ అధ్యక్షుడిగా ఎన్నికై సంచలనం సృష్టించిన ఇమ్మాన్యుయెల్‌ మెక్రాన్‌ తన మంత్రివర్గంలో సగం మంది మహిళలను తీసుకోవడం ద్వారా మరో సంచలనం కలిగిస్తున్నారు. 22 మందితో అయన సిద్ధం చేసిన మంత్రివర్గ జాబితాలో దాదాపు అన్ని వర్గాల వారికి చోటు కల్పించారు.
కన్జర్వేటివ్స్‌కు, సోషలిస్టులకు, కొత్తగా ఎన్నికైన వారికి ఆయన తన మంత్రివర్గంలో స్థానం ఇచ్చారు. మరో ఆసక్తికరమైన విషయం ఏమిటంటే మంత్రివర్గం కూర్పులో లింగసమానత్వాన్ని పాటించారు. సగం మంది పురుషులను, సగం మంది మహిళలను తన ప్రభుత్వాన్ని సమర్థంగా నడిపించే మంత్రులుగా స్వీకరించారు. మొత్తం 22మంది మంత్రులతో జాబితాను సిద్ధం చేసుకున్న మెక్రాన్‌ అందులో 11 మంత్రి పదవులు మహిళలకే ఇచ్చి ఔరా అనిపించారు.
రిపబ్లికన్‌ పార్టీకి చెందిన ఎడ్వర్డ్‌ పిలిప్పే తనకు కాబోయే ప్రధానిగా ప్రకటించగా, ప్రముఖ సోషియాలజిస్ట్‌ లయన్‌ మేయర్‌ గెరార్డ్‌ కొలంబోను తన ప్రభుత్వంలో రెండో స్థానం కల్పించి అంతర్గత వ్యవహారాలు కట్టబెట్టారు.
ఇక రక్షణ బాధ్యతలను సిల్వీ గోలార్డ్‌కు అప్పగించారు. ఆమె మాజీ అధ్యక్షురాలు ఫ్రాంకోయిస్‌ హోలాండ్‌కు అత్యంత సన్నిహితులైన జియాన్‌ వెస్‌లీ డ్రియాన్‌ నుంచి బాధ్యతలు చేపట్టనున్నారు. ఒలింపిక్‌ ఫెన్సింగ్‌ చాంపియన్‌ లారా ఫ్లెస్సెల్‌(45)కు క్రీడాశాఖ బాధ్యతలు అప్పగించారు. ఇలా దాదాపుగా తన మంత్రివర్గంలోకి తీసుకున్న వారికి గతంలో ఏ అంశాలపై పట్టుఉందో అందుకు తగినట్లుగానే శాఖలు కేటాయించారు.