//single page style gallary page

Questions? reply in 15 minutes!

Questions? reply in 15 minutes!

ఐదు వస్తువులపై జీఎస్టీ తొలగింపు, 35 వస్తువులపై తగ్గింపు

Category : business

కేంద్ర ప్రభుత్వం నూతనంగా తీసుకొచ్చిన వస్తు సేవల పన్ను(జీఎస్టీ) పరిధిలోకి చేనేతను తీసుకురావడంపై మొదటి నుంచి నిరసనలు వ్యక్తమవుతూనే ఉన్నాయి. ఈ నిర్ణయాన్ని పునః పరిశీలించి చేనేత రంగానికి జీఎస్టీ నుంచి మినహాయింపు ఇవ్వాలని కోరుతున్నారు. మొత్తానికి వీరి మొరను కేంద్ర ప్రభుత్వం ఆలకించింది. చేనేత ముడి సరుకులతోపాటు మరికొన్ని వస్తువుల రేట్లను కేంద్ర ప్రభుత్వం సవరించింది.

ఈనెల 9న హైదరాబాద్‌లో జరిగిన జీఎస్టీ కౌన్సిల్ 21వ సమావేశంలో నిర్ణయించిన మేరకు మొత్తం 40 వస్తువుల పన్ను శ్లాబులను మారుస్తూ ప్రభుత్వం సోమవారం నోటిఫికేషన్ విడుదల చేసింది. దీని ప్రకారం ఖాదీ వస్త్రాలు, చేనేత చరఖాలు, మట్టి విగ్రహాలు, పత్తి చెక్క, చీపుర్లను జీఎస్టీ నుంచి మినహాయించింది. ప్రస్తుతం ఖాదీ వస్త్రాలు, చీపుర్లు, పత్తి చెక్కపై ఐదు శాతం జీఎస్టీ ఉండగా మట్టి విగ్రహాలపై 28 శాతం, చేనేత చరఖాలపై 18 శాతం జీఎస్టీ ఉంది. తాజా మినహాయింపు నేపథ్యంలో ఇక నుంచి ఈ వస్తువుల క్రయవిక్రయాలపై ఎలాంటి పన్ను చెల్లించాల్సిన అవసంర ఉండదు. అలాగే మరో 35 వస్తువులపై కూడా జీఎస్టీని తగ్గించారు.

బిందు సేద్యానికి ఉపయోగించే నాజిల్స్, స్ప్రింకర్లపై గతంలో 18 శాతం జీఎస్టీ ఉండగా ప్రస్తుతం దాన్ని 12 శాతానికి తగ్గించారు. అలాగే కంప్యూటర్ మానిటర్లపై ఉన్న 28 శాతం జీఎస్టీ 18 శాతానికి తగ్గింది. ఇక కిచెన్, శానిటరీ సామగ్రి జీఎస్టీ 18 శాతం నుంచి 12 శాతానికి దిగొచ్చింది. అగరబత్తీలు, ధూప సామగ్రి, సాంబ్రాణీలపై గతంలో 12 శాతంగా ఉన్న జీఎస్టీని 5 శాతానికి తగ్గించారు. ప్రార్థనలకు ఉపయోగించే పూసలపై జీఎస్టీని 18 శాతం నుంచి 5 శాతానికి తగ్గించారు. ఇంకా జీఎస్టీ శ్లాబులు తగ్గించిన వస్తువుల్లో ఎండు చింతపండు, ఇడ్లీ, దోశ పిండి, దూది బొంతలు, చెక్క, రాతి, మెటల్ విగ్రహాలు, జౌళి టోపీలు, స్టెరైల్ డిస్పోజబుల్ గ్లౌజులు, రెయిన్‌కోట్లు, శారీఫాల్స్ ఉన్నాయి.