//single page style gallary page

Questions? reply in 15 minutes!

Questions? reply in 15 minutes!

సీఈఓ తన పరిధి దాటుతున్నారు...ఈసీకి బాబు ఘాటు లేఖ

Category : state politics

ఆంధ్రప్రదేశ్‌లో ఎన్నికల పోలింగ్ ముగియగానే వివిధ శాఖలపై ముఖ్యమంత్రి చంద్రబాబు నాయుడు సమీక్ష నిర్వహించడం పట్ల ఏపీ ఎన్నికల ప్రధాన అధికారి అభ్యంతరం వ్యక్తం చేసిన విషయం తెలిసిందే. ఈ విషయంలో ప్రభుత్వ ప్రధాన కార్యదర్శి, సీఎం మధ్య ప్రచ్ఛన్న యుద్ధం జరుగుతోంది. తాజాగా, దీనిపై కేంద్ర ఎన్నికల సంఘానికి సీఎం చంద్రబాబు లేఖ రాశారు. శుక్రవారం ఈసీకి 9 పేజీల లేఖ రాసిన చంద్రబాబు.. రాష్ట్రాభివృద్ధిని, ప్రజా సంక్షేమాన్ని అడ్డుకోవాలని ఎన్నికల కమిషన్ చూడటం దురదృష్టకరమని అందులో పేర్కొన్నారు. ఎన్నికల ఫలితాలు వెల్లడికాలేదన్న సాకులు చూపుతూ ఈసీ వ్యవహరిస్తున్న తీరు సక్రమంగా లేదని చంద్రబాబు ధ్వజమెత్తారు. ఈ విషయంలో ఎన్నికల కమిషన్ ఏకపక్షంగా వ్యవహరిస్తోందని ఆయన ఆరోపించారు.

వైసీపీ ఇచ్చిన ఫిర్యాదులపై మాత్రమే ఎన్నికల కమిషన్‌ స్పందిస్తోందని, తాము లేవనెత్తిన అభ్యంతరాలపై ఎలాంటి చర్యలు తీసుకోవడం లేదన్న బాబు, ప్రాజెక్టులపై సమీక్షలను అడ్డుకోవద్దని కోరారు. తన 40 ఏళ్ల రాజకీయ జీవితంలో ఇలాంటి ఎన్నికలను ఎన్నడూ చూడలేదని, శాఖలపై సమీక్ష చేసే అధికారం సీఎంకు లేదని సీఈవో ద్వివేది చేసిన వ్యాఖ్యలపై చంద్రబాబు అభ్యంతరం వ్యక్తం చేశారు. పోలవరం, రాజధాని నిర్మాణం, మంచినీటి ఎద్దడి, ప్రకృతి వైపరీత్యాలపై సీఎం సమీక్షలు ఎందుకు చేయరాదని అందులో ప్రశ్నించారు. ఇంటెలిజెన్స్‌ చీఫ్‌ను సీఎంకు రిపోర్ట్‌ చేయొద్దనడానికి సీఈవో ఎవరని చంద్రబాబు నిలదీశారు.

సీఈవో తన అధికార పరిధిని దాటుతున్నారని, ముఖ్యమంత్రికి ఇంటెలిజెన్స్‌ చీఫ్‌ రిపోర్ట్‌ చెయ్యకూడదని ఈసీ నిబంధనల్లో ఎక్కడుందని ఎదురు ప్రశ్నించారు. కేంద్రంలో ఐబీ చీఫ్‌ ప్రధానమంత్రికి ఎలా రిపోర్ట్‌ చేస్తారో... రాష్ట్రాల్లో కూడా ముఖ్యమంత్రికి ఐబీ చీఫ్ రిపోర్ట్‌ చేయాలని అన్నారు. ఈ విషయంలో కేంద్ర ఎన్నికల కమిషన్‌ జోక్యం చేసుకొని సీఈవోకు ఆదేశాలివ్వాలని, సమీక్షలపై సీఎం అధికారాలను ఆపే హక్కు ఈసీకి లేదని అందులో స్పష్టం చేశారు. ఏపీ ప్రజల హక్కులను కాలరాస్తున్నారని చంద్రబాబు దుయ్యబట్టారు. అకాల వర్షాలు, ఎండల కారణంగా గత వారంలో ఏడుగురు ప్రాణాలు కోల్పోయారని, ప్రకృతి వైపరీత్యాలపై జాగ్రత్తలు తీసుకోవాలని అధికారులను ఆదేశించే అధికారం సీఎంకు లేదా? అని లేఖలో ప్రశ్నించారు. బీజేపీ పాలిత రాష్ట్రాల్లో ఒక రకంగా, ప్రతిపక్ష పార్టీలు అధికారంలో ఉన్న రాష్ట్రాల్లో మరోలా ఈసీ పక్షపాతంతో వ్యవహరిస్తోందని చంద్రబాబు మండిపడ్డారు.