//single page style gallary page

Questions? reply in 15 minutes!

Questions? reply in 15 minutes!

హోస్టన్ వరదల్లో 200 మంది భారతీయ విద్యార్థులు

Category : world

రెండు వందల మంది భారత విద్యార్థులు అమెరికాలోని హోస్టన్ వరదల్లో చిక్కుకున్నారని కేంద్ర విదేశాంగశాఖ మంత్రి సుష్మాస్వరాజ్  ట్విట్టర్‌లో తెలిపారు. హోస్టన్‌లోని భారత కాన్సుల్ జనరల్ అనుపమరాయ్‌తో తాను మాట్లాడానని పేర్కొన్నారు. యూనివర్సిటీ పరిసరాల్లో మోకాలు లోతులో నీరు నిలిచి ఉందని, భారత్ నుంచి ఆహారం, ఇతర సామగ్రిని పంపించేందుకు ప్రయత్నించినా యూఎస్ కోస్ట్‌గార్డులు అనుమతించడంలేదని సుష్మ తెలిపారు.

సహాయ, పునరావాస చర్యల నిమిత్తం నాలుగు వేల దళాలను టెక్సాస్ గవర్నర్ జార్జ్ అబాట్ పంపించారని ఆమె పేర్కొన్నారు. ఇద్దరు భారత విద్యార్థులు షాలిని, నిఖిల్ భాటియాలను చికిత్స నిమిత్తం దవాఖానకు తరలించారని, వారి బంధువులను వీలైనంత తొందరగా అక్కడికి పంపించేందుకు ప్రయత్నిస్తున్నామని సుష్మా చెప్పారు.

అమెరికాలోని టెక్సాస్ రాష్ట్రం హార్వే హరికేన్ ధాటికి అతలాకుతలం అయ్యింది. గత యాబై ఏండ్లలో టెక్సాస్‌ను తాకిన అతి తీవ్రమైన తుఫాను ఇదేనని యూఎస్ అధికారులు చెప్తున్నారు. కేవలం వారం రోజుల్లోనే ఏండ్లలో కురవాల్సిన వర్షపాతం నమోదయ్యిందని పేర్కొన్నారు. హరికేన్ హార్వే శుక్రవారం టెక్సాస్ తీరాన్ని తాకింది. అనధికారిక సమాచారం ప్రకారం అయిదుగురు వ్యక్తులు మృతి చెందగా, 14మంది గాయపడ్డారు.

హోస్టన్‌తోపాటు టెక్సాస్‌లోని మిగతా ప్రాంతాల్లోని వీధులు, ఇండ్లు, రోడ్లు వరద నీటితో నిండిపోయాయి. కోటి ముప్పై లక్షల మంది ప్రజలు వరద ప్రభావానికి లోనయ్యారు. సుమారు మూడు లక్షల మంది అంధకారంలో ఉన్నారు. ఒక్క రోజులో అత్యధికంగా 50.8 సెంటీమీటర్ల వర్షపాతం నమోదయ్యిందని నేషనల్ వెదర్ సర్వీస్ ప్రకటించింది. వరద ప్రభావం మరికొద్ది రోజులు కొనసాగే అవకాశం ఉందని సంస్థ తెలిపింది. మంగళవారం తాను టెక్సాస్‌లోని వరద ప్రభావిత ప్రాంతాల్లో పర్యటిస్తానని అమెరికా అధ్యక్షుడు డొనాల్డ్ ట్రంప్ ట్వీట్ చేశారు.

Related News